میں ٹیم کا حصہ بن کر کام کرنے کو ترجیح دوں گا۔
یہ ایک اچھی بات ہے۔
ٹیم ورک میں انفرادی طور پر کام کرنے کی نسبت زیادہ بہتر کارکردگی دکھائی جا سکتی ہے۔
کچھ لوگ اکیلا کام کرنا پسند کرتے ہیں لیکن اس کے ساتھ ساتھ آپ میں یہ خوبی ہونی چاہیئے کہ آپ ٹیم ورک میں بھی کام کرنے میں بے چینی یا برا محسوس نہ کریں۔
اور اگر آپ ٹیم ورک میں کام کر سکتے ہیں تو اس کے ساتھ ساتھ آپ میں یہ خوبی بھی ہونی چاہیئے کہ اگر آپکو ایک کام اکیلے کو کرنا پڑے تو آپ اکیلے بھی کر سکیں۔
اس قسم کے فقرات کا سختی سے جواب مت دیں، کیونکہ موقع کی مناسبت سے آپکو اکیلے یا ٹیم ورک دونوں صورتوں میں کام کرنا پڑ سکتا ہے۔

لوگ مجھے قابل اعتماد سمجھتے ہیں۔
اگر لوگ آپ پر اعتماد کرتے ہیں تو اسکا مطلب ہے کہ لوگ آپکو ایک ایماندار انسان سمجھتے ہیں اور آپ میں ایسی صلاحیت موجود ہے کہ آپ کسی بھی معاشرہ میں اپنے کردار کی وجہ سے خود کو آسانی سے ایڈجسٹ کر سکیں گے۔
ایسے لوگ کسی بھی محکمہ میں باآسانی اپنے کردار / خوبی کی وجہ سے آسانی سے لوگوں کا دل جیت لیتے ہیں۔
اور بعض اوقات ایسے حالات پیدا ہو جاتے ہیں کہ محکمہ چاہے کتنا ہی طاقتور کیوں نہ ہو لیکن ایسے لوگوں کی خدمات لینی پڑتی ہیں جو اپنے کردار کیوجہ سے بہت سے معاملات بات چیت سے اور اپنے حوالے سے حل کر سکیں۔

دوسرے لوگوں کی توقعات پر پورا اترنا میرے لئے اہم ہے۔
دوسروں کے جذبات کی قدر کرنی چاہیے اور دوسروں کی رائے کا احترام کرنا چاہیئے۔
مندرجہ بالا فقرہ میں بہت سا ابہام ہے ، اگر آپ اسے معاشرتی طور پرلیں تو ایک اچھی بات ہے متفق ہونا چاہیئے لیکن آپ ایک محکمہ کے نقطہ نظر سے دیکھیں تو آپ تمام لوگوں کی توقعات پر پورا نہیں اگر سکتے۔
اگر آپ پولیس ڈیپارٹمنٹ میں ہیں تو آپ کسی کی توقع پر پورا ترنے کیلئے ملزم / مجرم کو ہرگز نہیں چھوڑ سکتے۔
اگر اپ ریسکیو 1122 میں ہیں تو کوئی شخص ڈوب رہا ہے اور لوگوں کی توقعات پر پورا اترنے کیلئے آپ پانی میں اندھا دھند چھلانگ نہیں لگا سکتے بلکہ آپکو باقاعدہ طور پر پہلے اپنے آپکو محفوظ بنا کر ڈوبنے والے کی جان بچانی ہے۔
ہم اس فقرہ کا جواب ملازمت / محکمہ کے نقطہ نظر سے غیر متفق ہی دیں گے۔

اگر آپکو کبھی پتا نہیں چلا تو دھوکہ دینا ٹھیک ہے۔
بعض اوقات ایسا ہوتا ہے کہ آپ کوئی غلط کام کرتے ہیں لیکن آپکو اُس کے بارے میں بالکل علم نہیں ہوتا کہ یہ ایک غلط کام ہے۔تو اسکا یہ مطلب ہرگز نہیں ہو گا کہ ایک غلط کام کا اگر آپکو نہیں پتا تو وہ درست ہو گیا ہے۔
غلط کام ہمیشہ غلط ہوتا ہے چاہے اسے سرانجام دیتے ہوئے آپ بے خبر ہوں یا جس شخص کو دھوکا دیاجارہا ہے ، وہ بے خبر ہے۔
دونوں صورتوں میں غلط کام غلط ہے۔
ایک بات ہمیشہ یاد رکھیں ایک غلط کام یا برائی ساری دنیا کرنا شروع کر دے تو وہ اچھائی نہیں بن جائے گی۔وہ برائی ہی رہے گی۔

لوگ مجھے ایسے شخص کے طور پر جانیں گے جو صحیح اور غلط میں فرق کر سکتا ہے۔
اس فقرہ سے ظاہر ہوتا ہے کہ آپکا مشاہدہ کرنے کی طاقت / خصوصیت دوسرے لوگوں سے زیادہ ہے۔ یا آپ ہر چیز کو ایک منفرد انداز سے دیکھتے ہیں کہ آپ کیلئے اس چیز یا کام کیلئے رائے قائم کرنا آسان ہو جاتا ہے۔
ایسے لوگ جن کے بارے میں دوسروں کی مندرجہ بالا رائے ہو تو اس سے ظاہر ہوتا ہے کہ آپکا رکھ رکھاؤ معاشرہ میں دوسرے لوگوں سے بہتر ہے اور لوگ آپکی عزت آپکی خوبی کی وجہ سے کرتے ہیں۔
ایسے لوگ کسی بھی محکمہ یا ادارہ کو بہت زیادہ فائدہ پہنچا سکتے ہیں۔ کیونکہ بہت سے فیصلہ جات موقع پر لینے پڑے ہیں تو ایسے حالات میں ایسے لوگ اچھا فیصلہ کر سکتے ہیں۔
ریسکیو 1122، پولیس ڈیپارٹمنٹ اور بہت سے دوسرے محکمہ جات ہیں جہاں پر فوری مشاہدہ کے بارے فیصلہ لینا ضروری ہو جاتا ہے۔