اگر میں کسی کام میں اچھا نہیں ہوں تو میں اس وقت تک محنت کرتا رہوں گا جب تک میں اس میں مہارت نہ حاصل کر لوں۔
اگر آپ کسی کام کو سیکھنے کیلئے بار بار کوشش کرتے ہیں تو اس کا مطلب ہے کہ آپ ایک محنتی انسان ہیں اور آپکی اس عادت کو دیکھ کر انٹرویو لینے والا یا پیپر چیک کرنے والا یہ اندازہ لگا سکے گا کہ آپ اپنی پریکٹیکل لائف میں بھی دل لگا کر محنت کریں گے ۔
اس قسم کے لوگ عموما زیادہ محنتی ثابت ہوتے ہیں اور ہر محکمہ میں ایسے لوگوں کو سراہا جاتا ہے۔

لوگ مجھے ایسے دیکھتے ہیں جیسے میں ایک بڑا انسان ہوں۔
اس قسم کے فقرات کا جواب دھیان سے دیں۔
اس قسم کے سوالات میں آپکی بہت باریک بینی سے دماغی حالت چیک کی جا رہی ہے کہ آپ کس قسم کی خوش فہمی میں مبتلا ہیں۔
آپکو اپنے منہ میاں میٹھوں بننے کی ضرورت نہیں ہے۔آپ ایک ملازمت سے متعلقہ امتحان میں شامل ہیں اور کسی قسم کی خوش فہمی مت دکھائیں اور نہ ہی اپنے آپکو بہت بری شے ظاہر کریں۔
اس قسم کے سوالات کا جواب دیتے ہوئے ذہن میں رکھیں کہ اگر آپ نے اپنے آپکو دوسروں سے اعلی اور دوسرے کو ادنی ظاہر کیا تو یہ سوال آپکے خلاف جا سکتا ہے۔

میں اپنے آپکو اس قابل سمجھتا ہوں کہ میں زندگی کے چیلنجوں کا سامنا کر سکتا ہوں۔
اس فقرہ سے آپکی پختگی ظاہر ہوتی ہے لیکن اسے اس حد تک بھی مت لے جائیں کی خوش فہمی / بہت زیادہ اوور ہو جائے۔
ہر انسان اپنے آپکو کسی نہ کسی قابل سمجھتا ہے لیکن اگر آپ سمجھنے کے ساتھ ساتھ عمل بھی کرتے ہیں تو یہ ایک اچھی عادت ہے اور دوسروں سے ہٹ کر ہے۔
انسان کو ہر وقت ہر قسم کے مسائل / چیلنچ سے نمٹنے کیلئے تیار رہنا چاہیئے لیکن احتیاط اور حاضر دماغی سے کام لینا چاہیئے۔
اگر آپ نفسیاتی طور پر خود کو اس قابل سمجھتے ہیں تو یہ ایک اچھی عادت ہے اور کوشش کریں کہ عام زندگی میں بھی خوش اسلوبی سے تمام چیلنجوں کا سامنا کریں تاکہ آپکی قوت برداشت بڑھے اور آپ ایک پروفیشنل انسان بن سکیں۔

بعض اوقات چھوٹی چھوٹی پریشانیاں بڑی اہمیت اختیار کر لیتی ہیں جن کی حقیقت میں کوئی اہمیت نہیں ہوتی۔
یہ حقیقت پر مبنی فقرہ ہے کہ بعض اوقات آپ کے سامنے ایسے معاملات آتے ہیں جو بنیادی طور پر ایسے ہوتے ہیں کہ اُن سے ایسے نتائج کی توقع نہیں کی جاسکتی لیکن وہ حالات کے ساتھ ایسی نوعیت اختیار کر جاتے ہیں جن کو حقیقت میں کوئی اہمیت نہیں دی جاتی۔
ایسے معاملات وقوع پذیر ہو سکتے ہیں لیکن ایسا شازو نادر ہو سکتا ہے ، عموما ایسا نہیں ہونا چاہیئے، اگر عموما ایسا ہوتا ہے تو اس میں آپکی غلطی / لاپرواہی وجہ بن سکتی ہے۔

میں اگر دباؤ کا شکار بھی ہوں تو میں دوسرے لوگوں پر ظاہر نہیں کرتا۔
یہ فقرہ ہم سابقہ سوال میں بھی زیر بحث لا چکے ہیں۔
اگر کوئی شخص پریشانی / دباؤ کے باوجود دوسرے لوگوں پر اپنے تاثرات ظاہر نہیں ہونے دیتا تو اسکا مطلب ہے کہ آپ ایک سلجھے ہوئے ، سنجیدہ اور ایک پروفیشل انسان ہیں۔
آپ جانتے ہیں کہ آپکو اپنے مقاصد حاصل کرنے کیلئے یا آپنے کام کو پایہ تکمیل تک پہنچانے کیلئے حالات کی مطابق کیسے جذبات و احساسات کا اظہار کرنا ہے۔

میں اپنی زندگی سے مطمئن ہوں۔
اپنی زندگی سے مطمئن ہونا اس بات کو ظاہر کرتا ہے کہ آپ اپنی زندگی کا ہر کام ایک طریقہ کار کے تحت سرانجام دے رہے ہیں اور یہی وجہ ہے کہ آپ ایک مطمئن انسان ہیں۔
اگر آپ اپنی زندگی کے معاملات کو ایک منظم طریقہ سے سرانجام نہ دیں تو ہو سکتا ہے کہ آپکی زندگی میں بہت سی پریشانیاں ہو جس وجہ سے آپ اپنی زندگی سے مطمئن نہ ہوں۔

لوگ جانتے ہیں کہ میں اپنے جذبات کو قابو میں رکھتا ہوں۔
اپنے جذبات کو قابو میں رکھنے والے لوگوں کو زندگی کی ہر میدان میں بہت زیادہ پسند کیا جاتا ہے۔
اگر آپ میں یہ خوبی ہے تو آپ ایک کامیاب انسان ثابت ہو سکتے ہیں۔اپنے جذبات کو قابو میں رکھنے سے آپ بہت سی پریشانیوں اور نقصانات سے بچ سکتے ہیں۔
اگر آپ کسی محکمہ میں ملازمت کے لئے کوشش کر رہے ہیں تو آپکی یہ خوب آپکو ملازمت کیلئے اہل ثابت کر سکتی ہے۔
کیونکہ نفسیاتی طور پر ایک نارمل انسان ہی اپنے جذبات پر قابو پا سکتا ہے۔

لوگ میرے بارے میں سمجھتے ہیں کہ میں دباؤ میں بھی ہر معاملہ کو بہتر سرانجام دے سکتا ہوں
ہر انسان کو کوئی نہ کوئی پریشانی ضرور لاحق ہوتی ہے وہ پریشانی کاروباری ہو سکتی ہے، ملازمت سے متعلقہ ہو سکتی ہے یا گھریلو معاملات سے متعلقہ ہو سکتی ہے۔
اگر کوئی شخص تمام پریشانیوں یا دباؤ کے باوجود معاشرے میں ایک نارمل انسان کیطرح زندگی گزار رہا ہے تو اسکا مطلب ہے کہ وہ ایک پروفیشنل انسان ہے۔
پروفیشنل اسے کہا جاتا ہے جو شخص ہر معاملہ اور حالات کے مطابق خود کو ڈھال لیتا ہے اور اپنے کام اور کارکردگی کو کم نہیں ہونے دیتا۔
ایسے لوگوں کو ہر محکمہ اورمعاشرہ میں سراہا جاتا ہے اور انہیں ہمیشہ ذمہ داری والے اہم کام ہی سونپے جاتے ہیں۔