میں بعض اوقات چیزوں کو آخری مرحلہ تک دیکھتا ہے / مشاہدہ کرتا ہوں۔
اگر آپ کسی بھی شے کے بارے میں آخر تک ریسرچ کرتے ہیں ، کسی بھی معاملہ کو آخر تک دیکھتے ہیں ، معاملہ کی تہ تک جاتے ہیں تو اسکا مطلب ہے کہ آپ ہر معاملہ کو سنجیدہ لیتے ہیں اور آپ میں سوچنے سمجھنے کی صلاحیت دوسرے لوگوں کی نسبت زیادہ ہے۔
آپ کسی بھی محکمہ میں کام کریں گے تو یقینا جلد بازی کی بجائے احتیاط اور مکمل سمجھ بوجھ کے ساتھ کام کریں گے جس سے محکمہ کی ترقی کے مواقع زیادہ ہیں۔
کیونکہ بعض اوقات ایسی نوعیت کا معاملہ ، کیس ، ڈاکومنٹ وغیرہ آ جاتا ہے جسے آخر تک پڑھنا ، جانچنا ضرروی ہو جاتا ہے، اگر آپ میں ایسی خاصیت ہے تو آپکی یہ خوبی آپکو ضرور فائدہ دے گی۔

میں تفصیل کے ساتھ منصوبہ بندی کے بجائے ساتھ ساتھ ہی پلاننگ کو ترجیح دیتا ہوں۔
کسی بھی کام کو شروع کرنے سے پہلے مکمل پلاننگ کرنا بہت ضروری ہے۔ بہت کم ایسے مواقع ہوتےہیں جہاں آپکو فوری فیصلہ لینا پڑتا ہے عموما 95 فیصد معاملات میں آپکو پوری پلاننگ کے ساتھ چلنا چاہیئے۔اگر آپ پولیس ڈیپارٹمنٹ، ریسکیو 1122 یاکسی اور بیلٹ فورس کیلئے کوشش کر رہے ہیں تو وہاں بھی آپ کسی بھی آپریشن سے پہلے مکمل پلاننگ کریں گے اگر آپ پلاننگ نہیں کریں گے تو کامیابی کی بجائے ناکامی کے امکانات بہت زیادہ ہوں گے۔
اور اگر آپ میں مندرجہ بالا خصوصیت ہے تو اس کا مطلب ہے کہ آپ ایک جلد باز انسان بھی ہیں جو آپکے خلاف جا سکتا ہے۔

اپنی ضرورت کے مطابق نتائج لانے کیلئے چیزوں کو احتیاط اور نظم و ضبط سے بروئے کار لایا جائے۔
میتھوڈیکل سسٹمیٹک اپروچ ایک ایسی ٹرم ہے جس میں ہر چیز کو ایک مخصوص اور منظم طریقہ کار کے تحت انتہائی محتاط انداز میں استمعال کیا جاتا ہے۔
اگر آپ میں یہ خصوصیت ہے تو آپ کسی بھی محکمہ خاص طور پر بیلٹ فورسز ( پولیس، آرمی، ریسکیو غیرہ ) کیلئے بہترین کارکردگی کا مظاہرہ کر سکیں گے۔
آپ ہر معاملہ کو ایک سسٹا میٹک اپروچ کے تحت لے کر چلیں گے جس سے قانون کے پاسداری کے ساتھ ساتھ لوگوں کو ریلیف بھی ملے گا۔

لوگ مجھے ایک صاف ستھرا انسان سمجھتے ہیں۔
صاف ستھرے لوگوں کو ہر جگہ ، ہر معاشرہ اور ہر محکمہ میں پسند کیا جاتا ہے۔
مذہبی طور پر بھی ہر مذہب میں صفائی کے بارے میں خاص تلقین کی گئی ہے۔
اگر آپکو لوگ صاف ستھرا انسان سمجھتے ہیں تو اسکا مطلب ہے کہ آپ کسی بھی معاشرہ یا محکمہ میں چلے جائیں تو آپ اُس معاشرہ اور محکمہ کیلئے بھی صفائی ستھرائی کے معاملات میں کارگر ثابت ہو سکتے ہیں۔
اپنے آپکو صاف ستھرا رکھنا یہ ظاہر کرتا ہے کہ آپ ایک سلجھے ہوئے انسان ہیں۔اور دوسرے امیدواروں کی نسبت یقینا آپکو ترجیح دی جائے گی۔

مجھے مختصر گفتگو کرنا پسند ہے۔
مختصر اور بامعنی گفتگو کرنا ایک نہایت اچھا عمل ہے۔
کامیاب لوگوں ہمیشہ اسی اصول پر کاربند رہتے ہیں۔آپ اگر زندگی میں کامیاب ہونا چاہتے ہیں تو اس اصول کو آپکو بھی رہنما بنانا ہو گا۔
مختصر اور بامعنی گفتگو سے آپ اپنا اور دوسروں کا وقت ضائع نہیں کرتے۔فضول گفتگو سے بہت سے بے وقوفیاں سرز د ہونے کا اندیشہ ہوتا ہے، جس کے باعث بہت سے پریشانیوں کا سامنا کرنا پڑ سکتا ہے۔۔
اگر آپ سائنسی حوالہ سے دیکھیں تو سائنس کہتی ہے کہ فضول گفتگو سے انسان کی توانائی ضائع ہوتی ہے۔

مجھے کسی دوسری تنظیم اور افراد کی نمائندگی کرنے میں خوشی ہو گی۔
چاہے آپ کسی ملازمت کیلئے امتحان کی تیاری کر رہے ہیں یا چاہے آپ کسی معاشرہ میں اچھی زندگی گزارنا چاہتے ہیں تو اس کے لئے ضروری ہے کہ آپ تمام لوگوں کے ساتھ یکساں سلوک برتاؤ کریں۔
اور تمام لوگوں کے ساتھ گھل مل کر رہیں اگر آپکو کسی دوسری تنظیم ، سوسائٹی یا لوگوں کی فلاح و بہبود کیلئے، ملکی سلامتی کو مدنظر رکھتے ہوئے نمائندگی کرنی پڑے تو آپکو بالکل بھی نہیں گھبرانا چاہیئے۔اور اگر کوئی آپکو اپنی نمایندگی کیلئے منتخب کرتا ہے تو اسکا مطلب ہے کہ آپ دوسرے لوگوں کی نسبت ہر بات اور کام کو بہتر طریقے سے سرانجام دے سکتے ہیں۔
میں کسی دوسری تنظیم کی نمایندگی آسانی سے کر سکوں گا بشرط کہ وہ تنظیم ملک و قوم کے خلاف نہ ہو۔

اگر مجھے ناواقت لوگوں کے سامنے تقریر کرنا پڑے تو میرے لئے یہ ایک آسان کام ہو گا۔
اگر آپ میں ایسی خصوصیت ہے کہ آپ ناواقف لاگوں کے سامنے بھی دلائل دے سکتے ہیں اور بات یا تقریر کر سکتے ہیں تو آپ ایک کامیاب انسان ہیں او رآپ میں لیڈر بننے کی صلاحیت موجود ہے۔
ایسے لوگ ہر محکمہ ، معاشرہ اور ملک کے لئے فائدہ مند ثابت ہوتے ہیں۔یہ خصوصیات ہر کسی میں ہونی چاہیئے ۔یہ ایسی خصوصیات ہوتی ہیں جو کتابیں پڑھنے سے حاصل نہیں ہوتیں یہ خصوصیات تربیت کے ذریعے پروان چڑھتی ہیں۔

بعض اوقات لوگ مجھے شرمیلا کہتے ہیں۔
پر اعتماد لوگوں کو ہر محکمہ ، ہر معاشرہ اور ہر جگہ پسند کیا جاتا ہے۔
پولیس ڈیپارٹمنٹ ، ریسکیو 1122 اور آرمی وغیرہ میں تو شرمانے اور جھجکنے کی گنجائش ہی نہیں ہے ۔ آپکا شرمیلا پن کسی کی جان لے سکتا ہے۔آپ نے سینکڑوں لوگوں کو بچانا ہے اور حفاظت کرنی ہے، یا اگر آپ محکمہ تعلیم یا کسی اور ڈیپارٹمنٹ میں ہیں تو آپ نے لوگوں کی رہنمائی کرنی ہے اگر آپ شرما گئے تو آپ بہت سے لوگوں کی زندگی اور مستقبل داؤ پر لگا دیں گے۔

میں ان گروپوں میں آرام محسوس کرتا ہوں چاہے ان میں مجھے کوئی جانتا ہو یا نہ جانتا ہو۔
کسی بھی پیپر میں بہت سے ایسے فقرات ہوں گے جنھیں گھما پھرا کر آپ سے بار بار پوچھا جائے گا۔
اگر آپ نے کسی ایک جگہ پر جواب رضامندی میں دیا ہے تو کوشش کریں کہ اس سوال سے ملتے جلتے سوالات کا جواب بھی رضامندی میں دیں۔
آگر کسی جگہ پر آپ کے جاننے والے لو گ موجود ہیں تو اسکا مطلب تو سمجھ آتا ہے کہ آپ آرام محسوس کریں گے کیونکہ کہ یہ ایک فطرتی عمل بن جاتا ہے۔
اگر آپ کے جاننے والے لوگ نہیں ہیں تو ظاہر سی بات ہے چاہئے کوئی بھی ہو کچھ نہ کچھ پریشانی تو ضرور ہو گی۔
ایسا ممکن نہیں ہے کہ آپ ہر جگہ ایک جیسا آرا م دہ محسوس کریں ۔یہ ضرور ہو سکتا ہے کہ آپ اتنا زیادہ قابل اعتماد ہیں کہ آپ بہت جلد لوگوں کو قائل کرلیں لیکن ہر معاملہ میں تھوڑا وقت درکار ضرور ہوتا ہے۔

مجھے توجہ کا مرکز بننا پسند ہے۔
یہ ایک فطرتی عمل ہے ، ہر انسان چاہتا ہے کہ وہ لوگوں کی توجہ کا مرکز ہو اور لوگ صرف اسی کے بارے میں اچھی اچھی باتیں کریں۔
یہاں پر دو پہلو ہیں ایک تو یہ کہ مجھے توجہ کا مرکز بننا پسند ہے اور اگر توجہ کا مرکز نہیں بھی بنا تو کوئی مسئلہ نہیں میں ایک نارمل انسان کیطرح برتاؤ کر سکتا ہوں۔
دوسرا پہلو یہ کہ میرے لئے توجہ کا مرکز بننا اتنا زیادہ اہم ہے کہ اگر میں توجہ کا مرکز نہ بن پاؤں تو میرے لئے ہر کام مشکل ہے اور میں اپنا برتاؤ نارمل لوگوں جیسا نہیں رکھ سکتا۔جو کہ ایک نارمل انسان کی عادت یا خصوصیت نہیں ہو سکتی۔